Ukrayina ve Rusiye cenk esirlerini deñişüvniñ daa bir basamağını keçirdi, dep bildirdi ukrayin lideri Volodımır Zelenskıy.
"Deñişüvler devam ete, daa bir basamaq. Bugün Silâlı quvetler, Milliy gvardiya, Devlet sıñır hızmetiniñ askerleri qayta. Olarnıñ çoqusı 2022 senesinden berli esirlikte edi", — dep yazdı o telegram kanalında.
Prezidentniñ aytqanına köre, Ukrayina er bir esirni tapmaq içün elinden kelgenini yapa. "Bütün insanlarımıznı evge qaytarmaq kerekmiz. Bu işte yardım etken er keske teşekkürlerimni bildirem", — dep qoştı o.
Cenk esirleri ile munasebet meseleleri koordinasion ştabı, Ukrayinağa 25 yaşını toldurmağan, yaralanğan ya da sağlığı fena olğan arbiylerni qaytarğanlarını bildirdi.
"Vatanğa Ukrayina Silâlı quvetleriniñ arbiy hızmetçileri, şu cümleden Arbiy deñiz quvetleri, Qara quvetleri, Desant-ücüm ordusı, Teritorial mudafaası quvetleri, Ukrayina Milliy gvardiyası ve Devlet sıñır hızmetiniñ askerleri qayttılar", — dep aytıla haberde.
Azat etilgenlerniñ çoqusı Mariupol mudafaası vaqtında esirlikke tüşti ve üç yıldan ziyade Rusiye apishanesinde tutuldı.
"Bugünki deñişimniñ hususiyeti — genç askerlerni evge qaytarıp oldıq. Eñ yaş qorçalayıcı 24 yaşında, ve o, Mariupol mudafaası vaqtında, 2022 senesi çeçek ayında, 21 yaşında esirlikke tüşti. Bundan da ğayrı, ÇAES-nı qorçalağan milliy gvardiya askerlerini azat etmege imkân oldı", — dep qoşa müessise.
Bugün azat etilgen eñ büyük esir 62 yaşında. Azat etilgenlerniñ arasında zabitler de bar. Arbiyler Donetsk, Harkiv, Lugansk, Herson, Kıyiv ve Sumı yönelişlerinde cenk areketlerinde iştirak etti, dep qayd ete ştab.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
