Qırımda Rusiye quvetçileri SBU ile işbirlik yapqanı içün Aqmescit rayonınıñ sakinini yaqalağan. Bu aqta ilk yaz ayınıñ 27-nde Rusiye FSB-sınıñ cemaat alâqaları merkezinde haber etildi.
1981 senesi doğğan Qırım sakini Telegram vastasınen SBU ile bağlanğanı ve soñra yarımadanıñ naqliyat infrastrukturası ve arbiy bölüklerniñ yerleşüv yerleri aqqında malümat toplağanı iddia etile.
Bundan ğayrı, Rusiye FSB-sınıñ bildirgenine köre, yaqalanğan erkek gizli yerden 1 kilogramm patlayıcı çıqarmağa tırışqan.
Müessisede onıñ adı ve soyadını aytmaylar. Rusiye kütleviy haber vastaları, Rusiye FSB-sınıñ binasında bir adamnıñ Rusiye quvetçileri tarafından bildirilgen vaqialar versiyasını tekrarlağanını köstergen videonı tarqata. Eger qabaatı isbatlansa, onı 8 yılğa qadar apis cezası bekley.
"KrımSOS" aq qorçalayıcı teşkilâtınıñ malümatına köre, 2024 senesi eñ azından 56 Qırım sakini Rusiye akimiyeti tarafından taqip etilgen. Cinaiy davalar içün sebepler olaraq Rusiye Federatsiyasında yasaq etilgen teşkilâtlarnen alâqalar, devlet hainligi, casuslıq, açıq beyanatlar, diverssiya teşkil etüv ya da zorbalıqqa çağıruvlar şeklinde qabaatlavlar qullanılğan.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.